O curso 2016-2017 é moi especial para Voz Natura. Contamos con 338 centros educativos e asociacións participando nesta edición e, ademais, estamos de aniversario. O noso programa cumpre dúas décadas de traballo por e para os ecosistemas de Galicia. 20 anos nos que a pegada Voz Natura quedou marcada nas catro provincias.
Co obxectivo de pór en valor estes 20 anos de acción ambiental en Galicia e de seguir traballando por un futuro sostible desde as aulas, deseñamos un completo plan de actividades. Ao longo do curso, Voz Natura conmemorará os cinco grandes temas que os proxectos abordaron durante estas dúas décadas con actividades especiais. Temas recorrentes que aparecen en moitos dos case 4.000 traballos executados ata o momento: a loita contra os incendios forestais, as reforestacións, a limpeza de zonas degradadas, a reciclaxe e os hortos escolares.
Ademais, un concurso de vídeos invitará os centros participantes a mostrar a súa traxectoria no programa. Para os profesores organizarase un novo curso homologado pola Consellería de Educación sobre desenvolvemento e divulgación de proxectos ambientais.
As conmemoracións finalizarán na festa fin de curso que se celebrará en xuño do 2017. Unha cita especial na que se entregará, ademais dos premios tradicionais, un galardón especial 20 aniversarios, en recoñecemento á traxectoria no programa dun dos centros que participaron en todas as edicións.
Nesta edición seguiremos contando co apoio dos nosos patrocinadores e cun recoñecemento para os profesores implicados. Unha ano máis, a Consellería de Educación e Ordenación Universitaria, a través da Dirección Xeral de Educación, Formación Profesional e Innovación Educativa, recoñecerá a coordinación dun proxecto Voz Natura como unha actividade de innovación educativa, co seu correspondente equivalencia como formación permanente do profesorado. Deste xeito, ao final do curso, a Consellería expedirá os certificados de participación ao persoal docente de todos aqueles centros públicos e concertados que participen.
