O colexio Os Sauces de Pontevedra gaña o Premio Galicia Voz Natura
Voz Natura concede o seu premio ambiental 2009-2010 ao colexio Os Sauces de Pontevedra polo seu traballo e compromiso na defensa da biodiversidade.
Así o decidiu o Comité Científico do programa logo de analizar e comparar o impacto ambiental dos 260 traballos presentados polos centros inscritos en Voz Natura nesta décimo terceira edición.
Co seu proxecto "Ecoauditoría Escolar" o colexio Os Sauces pon o broche de ouro a unha década de esforzos dedicados a mellorar a saúde ambiental da súa contorna.
Entre os seus logros, este centro pode presumir de conseguir reducir o seu consumo de auga unha media de 300 litros diarios nos últimos dez anos, o que supón case un millón de litros aforrados. E é que os alumnos deste centro pontevedrés, que son os encargados de supervisar o gasto de auga, papel, enerxía e residuos que se xeran no centro, lograron, dun xeito realmente exemplar, modificar condutas e desenvolver estratexias para lograr un mellor uso dos recursos dos que dispón.
Pero os seus éxitos ambientais non terminan aí: Ao longo do curso, e dentro do recinto escolar, os alumnos e profesores dos Sauces contribuíron á mellora da paisaxe vexetal dos seus xardíns, desenvolveron un intenso traballo de horticultura nos seus invernadoiros e realizaron un importante labor de concienciación sobre a necesidade de frear a perda de biodiversidade a través dun completo estudo sobre as especies ameazadas a nivel mundial e en concreto en España e Galicia.
Das saídas ambientais deste centro poden dar boa conta zonas como: As marismas de Alba, a área forestal de Couso, o río Rons, os muiños de Samieira, o lago Castiñeiras, o monte Castrove ou a praia da Lanzada, xa que todos estes lugares víronse favorecidos pola actuación decidida desta comunidade escolar.
Nesta décimo terceira edición do programa ambiental da Fundación Santiago Rey Fernández-Latorre o Comité Científico decidiu entregar os Premios Provinciais pola súa contribución ao coidado da contorna natural galego aos seguintes centros:
- Premio Provincial da Coruña: CEIP A Laxe de Valón por demostrar unha gran capacidade para involucrar a toda a comunidade na protección dos diferentes ecosistemas da súa contorna. Entre as múltiples actividades que desenvolveron ao longo do curso destaca un completo estudo sobre o impacto ambiental das obras de construción do porto exterior de Ferrol.
- Premio Provincial de Lugo: O CEIP Frei Luís de Granada de Sarria logrou reforestar e recuperar un antigo vertedoiro, iniciativa que pola súa vocación de continuidade convértese nunha aposta de futuro.
- Premio Provincial de Ourense: Colexio Guillelme Brown de Pereiro de Aguiar. A ciencia constitúe un elemento fundamental no desenvolvemento humano, por iso, incorporaron o método científico á comprensión da súa contorna nun proxecto tan ben organizado como orixinal.
- Premio Provincial de Pontevedra: Colexio La Inmaculada de Ponteareas pola súa decidida defensa da biodiversidade, eixo central desta edición, e por ser capaz de trasladar estas inquietudes.
Premios especiais do xurado Voz Natura:
O colexio rural agrupado Mestre Clara Torres de Tui e o CEIP Escultor Acuña de Vigo reciben as mencións especiais do Comité Científico.
Cun completo proxecto multidisciplinar sobre aspectos tan diversos como a reciclaxe, o coidado da contorna, a etnografía e o consumo responsable da auga os alumnos do CRA Mestre Clara Torres demostraron ser os xustos merecedores do Premio ao Mellor Proxecto Infantil da presente edición de Voz Natura.
O Comité Científico tamén quixo galardoar, esta vez co Premio Especial do Xurado, ao CEIP Escultor Acuña, un centro educativo adaptado para nenos con discapacidade auditiva que co seu proxecto "Recuperamos boas prácticas" reflexa, con gran sensibilidade, a capacidade integradora do centro.
A entrega de premios aos galardoados nesta décimo terceira edición terá lugar o próximo 5 de xuño na gran festa Voz Natura que, como cada ano, celébrase no parque de Acea de Ama (Culleredo).
Tamén alí entregarase un galardón ao centro que mellor expoña o seu traballo nunha mostra que se poderá visitar durante todo o día e que resumirá un intenso ano de traballo ambiental en defensa da biodiversidade.
Deste xeito o programa ambiental da Fundación Santiago Rey Fernández-Latorre despedirá a presente edición e dará o pistoletazo de saída ao décimo cuarto ano de Voz Natura, que terá como protagonista o consumo responsable da auga.
Xurado
O Comité Científco, que foi o encargado de supervisar e fallar os premios Voz Natura, está integrado por :Ramón Núñez Centella, director do Museo Nacional de Ciencia e Tecnoloxía; Marisa Castro Cerceda, bióloga e profesora da Universidade de Vigo; Fernando Garrido Suárez, xornalista e avogado; Marcos Pérez Maldonado, director técnico da Casa das Ciencias; Antonio Prunell Tudurí, biólogo, e José Antonio Díaz Núñez, micólogo e representante do Comité Científico Voz Natura.