Reforestacións Voz Natura por toda Galicia
Marzo é sinónimo de plantación Voz Natura. Dos 298 centros educativos e asociacións que participan este curso, a gran maioría escollen este mes para desenvolver as actividades de reforestación incluídas nos seus proxectos. A conmemoración do Día da Árbore o pasado xoves, día 21, esténdese ao longo de todo o mes e por todos os recunchos de Galicia.
O acto central do programa celebrouse este ano no concello de Oia, coa colaboración de Coca Cola. Alumnos do CEIP Refoxos, con apoio de axentes forestais e das comunidades de montes de Loureza e Burgueira, realizaron unha plantación en dúas zonas da Serra dá Groba, á beira do río Tamuxe, nun enclave natural que o comité científico de Voz Natura -que tamén participou no acto- cualificou de «espectacular».
Tamén na provincia de Pontevedra, os pequenos do CRA Mestra Clara Torres, de Tui, plantaron medio centenar de especies autóctonas nunha parcela da comunidade de montes de Pexegueiro, nunha xornada na que estiveron acompañados polos seus profesores, veciños e diversas autoridades.
Moi activos en Ourense
Os centros Voz Natura ourensanos están sendo dos máis activos este mes. Nas últimas semanas, centos de escolares cambiaron os libros polos sachos e puxeron o seu gran de area para recuperar os montes da súa contorna, nalgúns casos, afectados anteriormente polos incendios forestais. É o caso do CEIP de Seixalbo, do CPR Divina Pastora, do CPR Maristas ou do IES Lauro Olmo (O Barco), entre outros.
En Fisterra, 67 alumnos da ESO e seis profesores do colexio Nosa Señora do Carme fóronse ata o Monte do Cabo a plantar. E en Padrón, máis pequenos pero co mesmo entusiasmo, os escolares do CEIP Pousada Carcacía fixeron o propio nun espazo público da súa parroquia que están transformando de vertedero a zona verde. En ambos casos, os axentes forestales de cada lugar colaboraron cos máis pequenos nas súas actividades.