Voz Natura dedica a 19.ª edición a coidar os ecosistemas autóctonos
O 2015 foi declarado pola 68.ª edición de Nacións Unidas como Ano Internacional dos Chans. Ao fío desta conmemoración, pero avanzando un paso máis, o programa de educación ambiental da Fundación Santiago Rey Fernández-Latorre decidiu dedicar ao próximo curso á protección dos todos ecosistemas autóctonos de Galicia.
Entre os obxectivos específicos desta efeméride, Nacións Unidas refírese á necesidade de concienciar á «sociedade civil e os responsables da toma de decisións sobre a profunda importancia do chan para a vida humana» e de «educar ao público sobre o papel crucial que desempeña o chan na seguridade alimentaria, a adaptación e a mitigación do cambio climático, os servizos ecosistémicos esenciais, a mitigación da pobreza e o desenvolvemento sostible».
De acordo con estas recomendacións, Voz Natura decidiu dedicar a súa 19.ª edición, curso 2015-2016, á protección de todos os ecosistemas autóctonos coa finalidade de fomentar, en particular, o desenvolvemento de actividades que repercutan na protección dos chans.
Así, o programa anima aos equipos escolares e asociacións aspirantes a participar a que inclúan nos seus proxectos reforestacións e plantacións de especies autóctonas, actuacións para erradicar especies foráneas e para profundar no coñecemento e divulgación dos ecosistemas galegos.
O comité científico de Voz Natura quere chamar a atención para o próximo curso sobre a necesidade de protexer os chans en Galicia empobrecidos por mor dos incendios forestais e outras agresións. Ademais, apuntan á necesidade de traballar na erradicación de especies foráneas e pór en valor a flora e fauna orixinaria, como xa veñen facendo desde hai anos algúns colexios e institutos participantes.
Incripción: do 2 de febreiro ao 15 de marzo
Os centros educativos e asociacións que desexen formar parte da comunidade Voz Natura no curso 2015-2016 -e recibir financiamento para os seus proxectos da Fundación Santiago Rey Fernández-Latorre- deben marcar nas súas axendas o luns 2 de febreiro. A partir dese día, e ata o 15 de marzo, estará aberto o prazo de inscrición.
Os proxectos deberán presentarse a través do formulario que estará dispoñible aquí. A lista final de admitidos coñecerase a principios de xuño e os traballos comezará a executarse en setembro.