Vixésimo sétima edición (2023-2024)

Data clave no calendario de numerosos centros que participan este curso en Voz Natura: pasadomañá, mércores. E en efecto, o 15 de maio celébrase o Día Mundial de Acción polo Clima. E iso, a acción polo clima, non é que sexa necesario, senón que resulta fundamental neste planeta que tantos maltratan. E non será porque desde o máis pequeno grupo ecoloxista ata a ONU non avisasen: non hai planeta B.

Sábeno, vaia se o saben!, no CPR San Lorenzo, de Lugo, onde o infatigable profesor Miguel Leiva responde desde Galiciencia. «E que fan por aí?». E o home ponse a explicar de maneira resumida que é o que fan. E dá para encher unha páxina. «Estamos a presentar un traballo feito polos alumnos sobre canta auga absorben as árbores, comparando entre outros carballos con eucaliptos».

 O profesor describe os pasos que foron dando, primeiro plantando árbores (pero os carballos tardan en crecer), daquela plantando árbores xa algo crecidos, daquela metendo ramas en auga, aplicando a estatística matemática, calculando canto líquido consomen por centímetro cadrado de folla, asesorándose con outro estudo do centro de Lourizán, medindo o consumo por hectárea dunha especie e outra… Desde fóra parece unha tolemia, pero hai, sobre todo, moito método. «Miramos tamén o «estrés hídrico do chan», explica.

 En primeira liña de estudo do clima e protección do planeta, no seu humilde e fundamental medida, está tamén o CPR Os Sauces, de Pontevedra, cun proxecto ambiental de ecoauditoría escolar que se basea en dous grandes bloques temáticos: biodiversidade e ecosistemas, e desenvolvemento sostible e cambio climático.

Os Sauces é un dos tres centenares e medio de centros inscritos este curso en Voz Natura, iniciativa de La Voz de Galicia e a Fundación Santiago Rey Fernández-Latorre que conta co apoio da Consellería de Medio Ambiente e Cambio Climático, a Deputación da Coruña, a Fundación Alcoa, O Corte Inglés, a Fundación Ramón Areces e Inditex.

Non son, en absoluto, uns recentemente chegados, e ratifícao o profesor Ramón Sineiro: «Os alumnos dos Sauces levan xa máis de 20 anos plantando exemplares de árbores autóctonas en diversas zonas da comarca de Pontevedra. Superamos o milleiro!», e esa actividade fan que «coincida todos os anos coa celebración do Día da Árbore e do Día Mundial de Acción polo Clima».

 E en que acabou o longo experimento do profesor Miguel Leiva e os seus alumnos? «Nunha hectárea entran mil eucaliptos o douscentos carballos de 20 anos. Os primeiros consomen 27.000 litros de auga ao día, e os segundos 2.600. Pensando no futuro dos negocios relacionados co monte, ao mellor estamos pegándonos un tiro no pé».