Vigésimo séptima edición (2023-2024)

Regreso ás aulas. E co fin da Pascua e a chegada dun novo mes empeza, tamén, un novo ecorreto: #RetoConcienciamos, cuxo obxectivo é pisar o pedal da sensibilización sobre as consecuencias que poden ter as accións de calquera no medio ambiente, así como fomentar a acción social para coidar o planeta, que é o único que temos porque non hai recambio.

De ecorretos sabe moito a asociación Avelaíña, que os acepta, adopta e desenvolve mes tras mes. Dania Garrido non o dubida: «Dende esta asociación de Val Miñor, entidade que promove o  empoderamento e autonomía de persoas con problemas de saúde mental, estamos a levar a cabo o proxecto Biota». Ela mesma explica en que consiste: «Actuacións que impulsan o manexo  ambiental coa finalidade de prever, mitigar e compensar os procesos de deterioración dos  ecosistemas da nosa contorna e incentivar o seu desenvolvemento sostible». Pódese dicir máis alto, pero non máis claro.

Por suposto, non é a única entidade participante en Voz Natura que traballa a concienciación ambiental. E para demostralo aí está, por exemplo, o CEIP dás Vendas da Barreira, en Riós, municipio no cal o frío non impediu que se celebrase a Semana Santa.

A súa directora, Ana María Calvo, comeza botando a vista atrás e di que «desde o noso centro  cremos que é fundamental seguir impulsando as accións e a concienciación ambiental, por este motivo, e desde que comezou o curso, non paramos». 

Este CEIP tamén puxo en marcha un concurso de fotografía ambiental e que, en palabras de Ana María, «Está a resultar un éxito! Non só polo extraordinario material que estamos a recibir se non porque unhas actividades están a desencadear outras». E pon un exemplo: «A familia do noso alumno Gael aproveitou para recoller e reciclar o lixo que atopou mentres facía fotografías para o concurso. Non pode ser máis satisfactorio!». 

Pola súa banda, Dania Garrido, educadora social, xa mira ao futuro inmediato: «Para o  #RetoConcienciamos centrarémonos no Día da Terra, o 22 deste mes, promovendo a  protección do medio ambiente, a conservación da biodiversidade e a loita contra a contaminación e o cambio climático como un valor instrumental presente en todas as actividades».