Os centros educativos galegos celebran o Día do Árbore sacho en man
O proxecto que desenvolven os sonenses consiste na reforestación dunha superficie total de 16.000 metros cadrados, 12.000 en Montemuíño e 4.000 no lugar de Noal. As actividades reforzáronse este mes con motivo do Día de Árbore, data que aínda que cae o 21 de marzo de cada ano, os pequenos empezaron a celebrar o pasado martes 13.
Parece que non, pero os participantes foron capaces de plantar, en tan só catro xornadas, un total de 170 árbores que ademais de engrosar a masa forestal sonense, supoñen unha medida contra os incendios, pois o proxecto inclúe a substitución de especies pirófitas por outras máis seguras como os carballos ou os froiteiros.
Para cumprir os seus obxectivos, ademais do respaldo de Voz Natura, o colexio Santa Irene contou co apoio da Xunta de Galicia, que cedeu castaños, carballos americanos e cerdeiras, así como do Concello de Porto do Son, que fixo o seu con almendros, nogueiras e avellanos e encargouse da limpeza dos espazos nos que traballaron os nenos.
O broche final da semana de traballos a favor do ecoloxismo foi a xornada deste xoves, na que os alumnos se trasladaron aos arredores do local da comunidade de montes de Noal. Alí pasaron a mañá arrombando este espazo, que aínda que na actualidade é un agradable campo cheo de árbores grazas ao traballo dos nenos, ata hai uns anos era un bulleiral. «Todo isto era terra descuberta, nin céspede había», explica Suso Rodríguez, docente e coordinador do programa Voz Natura na escola.
Traballo en equipo
A parte de arriba da leira foi a escollida para sacar as primeiras paladas de terra. E alí estaba, en primeira fila, Carlos, un alumno de infantil ao que non lle daba medo coller o sacho na man. Por seguridade, o pequeno contou coa axuda dun asistente moi especial, o seu pai, Francisco Santos: «Aquí temos que botar unha man todos». Non moi lonxe de alí, mirando atentamente, estaba Laura, unha alumna de sexto máis que experta en plantacións grazas ás tardes na horta da súa avoa. «Gústame moito todo, excepto ir ás patacas, hai que baixar demasiado o lombo», sentenza con humor.
O gran protagonista foi Thiago, un pequeno ao que non o para nin a máis forte das paredes. Aínda que sofre atrofia muscular espinal desde que naceu, iso non supuxo un impedimento para el, que participou na plantación axudando aos seus compañeiros para suxeitar as árbores mentres eles manexaban as ferramentas. Coa axuda da súa coidadora, o raparigo utilizou con soltura o sacho para facer un buraco no que colocar, esta vez na parte de arriba da leira, unha nova árbore.
A entretida mañá contou coa presenza do concelleiro de Medio do Concello de Porto do Son, Juan José Calo, que puxo de manifesto que «non hai mellor maneira de coidar do noso patrimonio que que o fagan os propios nenos». Tamén estivo alí o alcalde, #Luis Oujo, que non dubidou en recoñecer o incrible traballo de recuperación levado a cabo polos pequenos: «Estano convertendo nun lugar para xogar na natureza».
Todas estas actividades enmárcanse no proxecto Voz Natura, programa de La Voz de Galicia desenvolto pola Fundación Santiago Rey Fernández-Latorre que conta co patrocinio da Consellería de Medio Ambiente, Territorio e Vivenda, a Deputación, as fundacións Alcoa e Ramón Areces, O Corte Inglés e Inditex.