Máis de 78.00 estudantes e 3.700 docentes participan na 27.ª edición de Voz Natura
Entre setembro e xuño, cada centro executará un proxecto ambiental, que xa foi revisado e aprobado polo comité científico do programa para garantir a súa viabilidade e rigor científico. Un ano máis, haberá reforestacións e plantacións na contorna das escolas, invernadoiros e hortos no recinto escolar, limpezas de praias e ríos, reciclaxe e investigación.
O tema central do curso —sobre o que se propón realizar actividades específicas xunto a todas as demais— é o coñecemento e a protección da flora e fauna autóctonas. Trátase de que os estudantes traballen para frear o empobrecemento da biodiversidade e a destrución de hábitats. E farano a través de diversas actividades para protexer especies en perigo de extinción, creando biorrefugios, investigando sobre especies da contorna próxima, reforestando con especies arbóreas autóctonas ou eliminando especies invasoras.
Para levar a cabo estes traballos, os equipos contarán con financiamento da Fundación Santiago Rey Fernández-Latorre e grazas ao patrocinio da Consellería de Medio Ambiente, Territorio e Vivenda, a Deputación da Coruña, a Fundación Alcoa, O Corte Inglés, a Fundación Ramón Areces e Inditex.
Outras propostas
Ao longo do curso, Voz Natura activará outras iniciativas para que os centros poidan completar as súas actividades ambientais. Volverán os ecorretos mensuais para que compartan a través das redes sociais as súas accións sobre unha problemática ambiental diferente cada mes do curso.
Volverá a Garda Civil e a Policía Nacional aos colexios e institutos para falar sobre protección ambiental e prevención de incendios e as visitas ao Museo Nacional de Ciencia e Tecnoloxía, entre outras novidades que se irán presentando ao longo do ano.