Vixésimo sexta edición (2022-2023)

Punto final ao curso 2022-2023 e punto final tamén á 26.ª edición de Voz Natura, dedicada ao consumo responsable, sostible e respectuoso co medio ambiente. Os amigos das estatísticas agradecerán saber que participaron 368 centros educativos e asociacións, e iso quere dicir preto de 80.000 alumnos e 3.500 profesores, dos cales 900 estudantes e 440 docentes participaron tamén en Naturacción, un programa patrocinado pola Fundación Alcoa co respaldo de Alcoa San Ciprián e a colaboración da Consellería de Educación.

Súmese a iso numerosas familias, concellos, concelleiros a título individual, activos bibliotecarios locais, algún alcalde que non dubidou en remangarse, ídem con membros da policía local que acudiron como pais de alumnos e, está claro, Protección Civil, sempre disposta a botar unha man cando había acción directa monte arriba ou praia adiante.

E, despois da resaca dos premios de Voz Natura, a reflexión leva a analizar que destacou nestes meses. Consenso na organización ao falar da realización de proxectos de emprendemento científico ou empresarial e do incremento de traballos tecnolóxicos ao servizo do medio ambiente. E aparecen os exemplos: redución do consumo auga, reutilización de plásticos, desenvolvemento de códigos QR para identificación espazos naturais e a súa flora e fauna, incremento das ecoauditorías e actividade sen fin das ecobrigadas escolares. A satisfacción estendíase tamén ás visitas ao Muncyt e á colaboración da Garda Civil e a Policía Nacional.

Detrás de Voz Natura está o esforzo diario de moitas persoas, entre elas as integrantes do comité científico, que ademais das visitas aos centros desenvolven un labor calado de asesoramento e fixación de estándares de calidade dos proxectos. Mesmo pode dicirse que gran parte do curso permanecen na sombra. Todos menos un, o seu portavoz, Alejandro Díaz, ao que, como dicía un profesor veterano, «deben coñecelo ata as árbores», porque mes tras mes non para de visitar colexios.

A frase está gastada de tanto ser usada, si, pero agora é máis certa que nunca: hoxe non é un adeus senón un ata logo, porque xa se está traballando na edición número 27, a cal arrincará con toda a súa forza en setembro. Será o reencontro de alumnos e profesores con Voz Natura, unha iniciativa de La Voz de Galicia e a Fundación Santiago Rey Fernández-Latorre que conta co apoio da Consellería de Medio Ambiente, Territorio e Vivenda, a Deputación da Coruña, a Fundación Alcoa, O Corte Inglés, a Fundación Ramón Areces e Inditex.

E felices vacacións… respectuosas co medio ambiente!