Escolares de Voz Natura visten de Nadal o hospital de Ourense
No caso deste colexio da capital ourensá, son 1.068 alumnos, desde infantil a bacharelato, os que participan nun proxecto multidisciplinar que traballa diversos aspectos asociándoos a materias curriculares dependendo da súa idade.
Os máis pequenos cultivan o seu propio horto e desenvolven un plan de separación de residuos, e segundo van avanzando en idade, os traballos diversifícanse. O cambio climático, o consumo responsable, a limpeza de contornas naturais ou a reciclaxe forman parte do plan.
No caso dos alumnos que decidiron adornar a área infantil do hospital aproveitaron o traballo en reciclaxe. «Desenvolvemos o programa Pasaporte Solidario no que os escolares de quinto e sexto realizan actividades de voluntariado ben sexa para axudar ao colexio, á cidade ou a países pobres. Esta idea de alegrarlle o Nadal a outros nenos que pasan estes días ingresados pareceunos unha forma moi bonita de unir esa solidariedade co traballo que estamos a facer con Voz Natura», explica a profesora Laura Valcárcel.
Nas últimas semanas elaboraron obxectos que servisen de decoración do Nadal. «Estabamos a traballar a concienciación sobre o consumo responsable e queriamos que visen que nesta época pódense facer cousas superchulas aproveitando o que temos», comenta Valcárcel. Briks de leite, xornais vellos, folios usados, cartóns e pinturas verdes e douradas foron a materia prima da que saíron lazos, adornos e tres árbores #do Nadal.
«Inicialmente non pensabamos facer tantos, pero unha enfermeira comentounos que este ano, como hai moitos ingresos por patoloxías respiratorias, abriron camas tamén na cuarta planta, así que decidimos que cubrir máis espazos», matiza a coordinadora.