Voz Natura esperta vocacións científicas
Sábeo ben Verónica Camiña, profesora do CEIP de Reboreda (en Redondela, con algo máis de dous centenares de alumnos) que se mostra moi animada co traballo dos seus alumnos de sexto. Metéronse no proxecto Alba, relacionado co Sincrotrón (a maior infraestrutura científica e tecnolóxica de España). «Temos catro retos-desafíos, e estamos cos primeiros —di Verónica—. Arrincamos en outubro e é un proxecto para o curso enteiro». Todos eles relacionados coa luz e a materia. Exemplar.
Como exemplar é tamén o traballo que desenvolven os sete equipos de segundo de ESO do CPR San José de Ourense. Carlos Pérez, un profesor que atesoura unha longa experiencia no mundo da pedagoxía práctica da ciencia, teno todo previsto: «Cada grupo traballa cunha temática distinta durante catro meses, e o 1 de marzo celebraremos unha xornada de portas abertas na que se inaugura unha exposición co que fixemos». E despois? «Despois imos movela, non só en Galiciencia aquí en Ourense, senón tamén en Madrid e Barcelona».
O proxecto encerra dobre mérito, porque traballan nos recreos e dúas tardes á semana, sempre fóra de horario lectivo. É dicir, esforzo extra que, desde logo, merécese a maior das recompensas: o orgullo de Ourense (en realidade, de Galicia) de contar cun centro así.
Outro infatigable con Voz Natura é Miguel Leiva, profesor do CPR San Lorenzo, de Lugo, a quen a chamada lle colle a 8 km da súa cidade traballando nun dos proxectos cos seus alumnos. Miguel Leiva expuxo preguntas, e case tres ducias de estudantes afánanse en buscar respostas: Analizando o escaravello da pataca resulta posible saber se o tubérculo que nos vende contén pesticidas? Como controlamos as pragas ao noso favor? O bledo podemos convertelo en planta forraxeira?
Tamén destaca outro centro experto en espertar vocacións científicas como o IES de Sar de Santiago de Compostela. Na contorna do centro, nas Brañas de Sar e no centro histórico da súa cidade realizan análise de potabilidade das fontes e de contaminación atmosférica, utilizando liques bioindicadores. Ademais estudan a variabilidade morfolóxica das landras do robledal do parque Granell e do “Carballo de Conxo” e tamén editan unha revista científica —LANDRA— cos resultados das súas investigacións.
Voz Natura en acción
Co obxectivo de conservar e poñer en valor o patrimonio histórico científico e tecnolóxico e contribuír á educación científica efectiva e de calidade puxéronse en marcha as visitas ao Museo Nacional de Ciencia e Tecnoloxía (Muncyt) con novas propostas de actividades e talleres educativos adaptados a todas as idades.
Ademais, durante este mes de novembro, Voz Natura anima aos centros participantes a participar nun novo ecorreto: #retoinvestigamos para fomentar o desenvolvemento sostible e protexer o noso medio ambiente.