Samaín con conciencia ambiental
Que llo digan se non a Uxía Quintela, profesora da EEI San Roque de Viveiro. O case setenta alumnos lanzáronse, co notable apoio das súas familias, a deseñar e elaborar monstros coa condición de que fóra con material reciclado. Así, tal e como soa, porque durante o curso van traballar con monstros, incluíndo lectura de contos porque «para nós a biblioteca é moi importante, planificamos as cousas ao redor de ela», en palabras da profesora. E que fixeron con tanto monstro? Pois unha exposición. «E quedounos moi chula», remata, con claro orgullo, Uxía Quintela.
Outros firmemente comprometidos son os 24 alumnos do CEIP San Cosme de Barreiros, que tamén «grazas á colaboración das familias» (son palabras da súa profesora Vanessa Belo) reuniron unha ampla colección de cabazas con formas de casas de todo tipo (hainas con forma de niño para paxaros) dentro do proxecto «Abre a porta e verás».
Tamén os máis pequenos do CPR María Auxiliadora (os salesianos), en Ourense, estiveron con actividades estes días no invernadoiro, o horto e os xardíns do cole. Quique Fernández, cos maiores, xa está a pensar en futuras saídas para máis adiante tras visitar a serra de Ou Invernadoiro e, hai dúas semanas xustas, levar a cabo un roteiro polos arredores da súa cidade co fin de que os alumnos identificasen ecosistemas.
Tampouco perden o tempo no CEIP de Vilarmide, en Muxía. A súa profesora Estefanía Campos acaba de pedir o material para seguir adiante co que xa é unha tradición por estas datas: Cogumelandia, cultivando cogomelos na aula, algo no que participa o medio centenar de alumnos con que conta o centro, que nada máis chegar en setembro atopáronse con amorodos no seu invernadoiro escolar. «Podamos e imos plantar de novo», di Estefanía Campos.
Todo iso, apoiado por Voz Natura, unha iniciativa creada por La Voz de Galicia e a Fundación Santiago Rey Fernández-Latorre, e que conta co apoio da Consellería de Medio Ambiente, Territorio e Vivenda, a Deputación da Coruña, a Fundación Alcoa, O Corte Inglés, a Fundación Ramón Areces e Inditex.