Vigésimo cuarta edición (2020-2021)

A grandes males, grandes remedios. Isto deberon de pensar os profesores que neste curso recentemente acabado participaron en Voz Natura, o programa educativo da Fundación Santiago Rey Fernández-Latorre que conta co patrocinio da Consellería de Medio Ambiente, Territorio e  Vivenda, a Deputación da Coruña, a Fundación Alcoa, O Corte Inglés e a Fundación Ramón Areces. Sen esquecer a sempre excelente colaboración do  Muncyt coruñés que, este ano, debido á situación sanitaria, ofreceron visitas virtuais ao museo aos centros educativos e asociacións que participan no programa. 

Porque a situación sanitaria e as duras restricións iniciais provocaron que se espertase unha gran creatividade e innovación no desenvolvemento dos proxectos ambientais. Un exemplo? A utilización de recursos tecnolóxicos: códigos  QR, stop  motion, camiños virtuais, etc. que ata entón ou non existían ou eran residuais.

Botando a vista atrás constátase que a acción directa quedou aparcada ao principio, pero a melloría dos últimos meses permitiu recuperala, e miles de alumnos saíron a  reforestar, limpar camiños e ríos, e coidar con agarimo os hortos e aulas da natureza.

A protección e recuperación da contorna natural do Camiño de Santiago (ou mellor, os Camiños de Santiago) foi o núcleo central desta edición. Unha edición que viu nacer en febreiro un espazo web sobre innovación educativa en  medioambiente, na páxina de Voz Natura (www.voznatura.com/innovación-educativa), e que rematou co acto de entrega de galardóns que o  covid non puido impedir. É o momento de lembrar que o premio Galicia -o principal- foi ao IES de Sar, de Santiago.

O certo é que as actividades de Voz Natura foron de gran axuda para motivar aos alumnos. Sempre, por suposto, pero moi especialmente neste durísimo curso escolar que saíu adiante grazas ao respecto ás normas  anticovid e, sobre todo, ás bravas ilusión e esforzo que puxeron os profesores. Nunha reunión de programación na Fundación Santiago Rey Fernández-Latorre, reflexionando sobre iso, unha das asistentes dixo unha frase que quedou gravada: «Cando eses mozos crezan asombraranse ao saber como se deixaron a pel os seus profesores para sacar adiante os proxectos de Voz Natura».

Se este curso puidésese reducir a cifras, habería que dicir que participaron 365 centros educativos e asociacións, o cal significa 80.900 alumnos e 3.300 educadores. Pero non, a alma de Voz Natura nunca se poderá reducir a un significativos pero fríos números. Demostrouse durante eses meses. E Galicia enteira demostrarao o curso que vén, 25.º aniversario de Voz Natura. Longa vida ao programa e felices vacacións a todos!